████ منو يتراهن أبليس عاف العراق؟ أخر صيحه ████

السلام عليكم ورحمة الله وبركاته
طبعاً اعذروني عن انقطاعي بقسم النقاش بسبب ضروف بعدتني عن المنتدى وأنشغالات داخل وخارج البغدادي ..
اليوم موضوعي مختلف.. لا ومختلف هواي .. ويلا خلي نبلش

اليوم كنت (باب الشرچي) وهاي منطقه في بغداد هاي اخاف احد ما يعرفها ..
المهم طخت براسي اصبغ حذائي تكرمون.. باوعت يمنى يسرى .. لمحت رجال عجوز عمره فوكً ال70 سنه تقريباً .. مخلي تنكه وكم شيشه صبغ .. وفرچة ..رحت يمه السلام عليكم السلام خليت رجلي ..
وبده يصبغ ..
وره شوي جان يكول تدري أبليس ماكوا بالعراق.. فاني أبتسمت كًلت هذا لاكًف شورطني هسه ..
شو هذا جان يعيط وبالقران ونزلهم كلهم حلفان انو ابليس مو بالعراق .. كتله وشلون عرفت .. جان بده يحجيلي ..
البارحه دا انام جان يجي عليه بليس كالي في أمان الله أني رايح هع هع
طبعاً اني متت ضحك .. وهو يحلف .. المهم كتله وشكتله
كًله وين تروح يمعود .. كله هنا بالعراق بعد مالي الي عازه راح اهاجر للقمر ..
كله ليش ..؟
كله هنا الفساد منكم وبيكم ما محتاجين الواحد يوسوس الكم ..

يعني قبل جنت أوسوس للشباب يذب حجايه للبنيه الماره .. هسه همه الشباب من يمهم فشار وحجي على البنيه بكلمات أني ابليس أستحي أكولها ..

قبل جنت أوز العالم تنسى ذكر الله .. هسه همه يكفرون برب العالمين بدون أي سبب..


من مسؤول يبوك 100 مليون دولار ويكًلب بيها ومحد يحاسبه .. ومن أطفال يدورن بالزبل وينحسبون بتهمة الأرهابيه .. بشرفك هذا هم بلد أظل بي .. ؟
ما عده البوكً والنهب بالدوائر والوزارات .. شأحجي شاكول ...

بحيث كمت أوسوس بالعكس وأكول للحرامي كافي .. وللناهب بطل ..وللزاني عيب ما شبعت ..
وللمسؤول أرحم ..
كل هذا ودكًولي أبقى .. أذا أنتوا واحدكم أبليس شعندي باقي ..
طبعا خلص صبغ وأنطيته الفلوس .. وسالت عليه الداير مدايره كالولي هذا مخبل ..

المهم برايكم كلامه مال مخابيل؟. وشنو تعليقكم ..
أريد اسمع ارائكم ..
أحترامي